په‌رتووکا ( دراســـة عـــن تـــرکیا و مــــوقفـــها مــــن المــــسالة الـــکــــوردیة ) – انــــتکاســـة الثـــــورة الـــــکوردیة فی آذار 1975 واســــتئنافـــها فی 26 ایار 1976- وه‌ک چاره‌مین وه‌شانا سه‌نته‌رێ کۆماته ژ چاپێ ده‌رکه‌فت.
ئه‌ڤ په‌رتووکه ڕاپۆرته‌کا درێژا 75 لاپه‌ڕه‌یی یا ڕێڤه‌به‌ریا گشتیا ئاســـایشــــا ئـــیراقێ یه. نــاڤه‌ڕۆکا وێ پێکتێت ژ وان پێزانینێن کو ئـــه‌مــنا ئـــیراقێ ل سه‌ر بزاڤێن گه‌لێ کورد ل سه‌ر سنوورێ باکوور و باشوورێ کوردستانێ کۆمکرین، هه‌ر ژ شکه‌ستنا شوڕشا ئه‌یلولێ ل ڕۆژا 6 ئادارا ساڵا 1975 و هه‌تا مه‌ها تیرمه‌ها ساڵا 1977.
ژ به‌ر کو ئه‌ڤ ڕاپۆرته به‌حس ل وێ هه‌رێمێ دکه‌ت یا کو چریسکا ئێکێ یا شوڕشا گولانێ ژێ ده‌رکه‌فتی و وی سه‌رده‌مێ کو ئاماده‌کاریێن ده‌ستپێکرنا شوڕشێ دهاتنه کرن و ده‌مێ ده‌ستپێکرنا شوڕشێ و وه‌رارکرنا وێ. ژ به‌ر هندێ گه‌له‌ک پێزانینێن گرنگێن وی سه‌رده‌می تێدا هاتینه. ژ به‌ر هندێ ڤێ په‌رتووکێ گرنگیه‌کا دیرووکیا باشا هه‌ی.
په‌رتووک د ده‌مێ خوه دا وه‌ک نامیلکه‌یه‌کێ ل مه‌ها تیرمه‌ها ساڵا 1977 ژ ئالیێ پشکا سێ یا ڕێڤه‌به‌ریا گشتیا ئاسایشا ئیراقێ ڤه ل به‌غدا هاتیه چاپکرن، ژ بۆ ئه‌فسه‌ر و کارمه‌ندێن ده‌زگایێ ئاسایشێ بخوه.
د.پ. عبدالفتاح بۆتانی ئه‌ڤ په‌رتووکه ئاماده‌کریه و پێشه‌کیه‌کا درێژ، لگه‌ل په‌راوێزا بۆ نڤێسیه. هه‌روه‌سا ڕزگار کێسته‌یی به‌رپرسێ سه‌نته‌رێ کۆماته پێداچوون بۆ په‌رتووکێ کریه. قه‌بارێ په‌رتووکێ 165 لاپه‌ڕه‌یه.
سه‌نته‌رێ کۆماته ب هه‌ڤپشکی لگه‌ل په‌رتووکخانا بۆتانی ڕابوویه ب چاپکرنا په‌رتووکێ و تا کو چه‌ند ڕۆژه‌کێن دی په‌رتووک دێ ل سه‌نته‌رێ کۆماته و په‌رتووکخانا بۆتانی به‌رده‌ست بیت.
